DALIIL
| Maansadan cusub ee la magac baxday DALIIL
waxaa curiyey abwaan Axmed Cabdi Geele. Waa maanso waddani ah oo uu abwaanku
ku cabirayo xaaladda maanta ee Soomaaliya, kuna guubaabinayo ummadda Soomaliyeed |
 |
Ma dhamaanin doodii
wanaag loogu magac daray
Anna daabaddaan koray
weli faraskii kama degin
Jeer aan daliishado
daruuraha cirkoo da'ay
Dhulkana doog ka soo baxay
Xooluhu ku darareen
Dumarka iyo caruurtii
Diihaalku soo maray
Ku soo daalay gaajadu
Farxad iyo damaashaad
Dugsiyada la joogaan
Furi maayo duubkoo
Faraskayga kama dego
..............................
Jeer aan daliilshado
Dadkan kala shakiyayee
Shaydaanku kala dilayoo
Deris iyo walaalo ah
Dirirtii sokeeyiyo
Dulmigay sameeyeen
Deeqsiga ilaahay
Dembi dhaaf si wada jira
Uga doona keligii
Furi maayo duubkoo
Faraskayga kama dego
..............................
Jeer aan daliishado
Dawlad caadiloo wacanoo
Diinta iyo shareecada
Dastuur nooga yeeshoo
Xaqa dibadda yaallaa
Dadka uu u siman yahay
Furi maayo duubkoo
Faraskayga kama dego
..............................
Jeer aan daliishado
Calankii la duugaye
lagu daray xabaaluhu
Xamar dacaladeediyo
Gobolada dalkoo idil
Isagoo dul sudhanoo
Sida dayaxa oo kale
Shacabkeenu daawado
Furi maayo duubkoo
Faraskayga kama dego
..............................
Jeer aan daliishado
Xoogii dalkee tegey
Diyaaraadka samadiyo
Dabaabaadka guuxee
Goobaha dagaalkiyo
Efenteri dirays xidhan oo
U midaysan daafaca
Furi maayo duubkoo
Faraskayga kama dego
..............................
Jeer aan daliishado
Heeryada dusheeniyo
Duudkeena saarani
Iyadoo na daysoo
Sharaftaynu duugniyo
Derejadaan lahaynoo
Rabi noogu deeqoo
Dadku inagu kuunyaan
Furi maayo duubkoo
Faraskayga kama dego
..............................
Jeer aan daliishado
Dahabkiyo shidaalkiyo
Khayraadka dihinoo
Debedaa la soo dhigay
Deegaanku yahay qani
Dawladaha shisheeyee
Ina duudsiyaayaa
Ina soo dalbaanoo
Shaqo inaga doonaan
Furi maayo duubkoo
Faraskayga kama dego
..............................
Jeer aan daliishado
Wankeenii la diidiyo
Dibigii la nacayoo
Dekedaha ka dhoofoo
Doonyuhu xambaaraan
Furi maayo duubkoo
Faraskayga kama dego
..............................
Jeer aan daliishado
Damalka iyo galoolkii
Duunyadu ku noolayd
Ee dabarka loo jarayoo
Laga daayey goontii oo
Dib u soo cawaal baxay
furi maayo duubkoo
faraskayga kama dego
..............................
Jeer aan daliishado
Qaxootiga daluumaye
Debedaha u kala kacay
Iyadaan dalkuu tegey
Ka dalbaynin geediga
Dib u soo noqdeenoo
Ay soo dalxiiseen
Furi maayo duubkoo
Faraskayga kama dego
..............................
Jeer aan daliishado
Dalkii gaalku iibshaye
Shanta gees u kala diray
Qaar deriska laga gaday
Deyr qudha ku wada jira
Calan keliya daafaca
Furi maayo duubkoo
Faraskayga kama dego
..............................
Jeer aan daliishado
Cusbataaladii dumay
Ee digfeer u weynaa
Oo dib loo hagaajoo
La daweeyo maatada
Digtooradi ka dhoofaye
Debedaha miciinsaday
Diyaaraadka guuxiyo
Ay doonyo keeneen
Dekedaha ka soo degey
Dantii ay lahaayeen
Hawsha qaran ka door biday
Oo daacadnimo iyo
Dadaal yahay iskaashigu
Furi maayo duubkoo
Faraskayga kama dego
..............................
Jeer aan daliishado
Dulmigan baahay ee jira
Ee daalin xoog weyn
Daciifka iyo miskiinkii
Kaga diirto xoolaha
inta xaqu dilaaciye
Sida dayaxa soo bixi
Furi maayo duubkoo
faraskayga kama dego
..............................
Jeer aan daliishado
Daaraha hargeysiyo
Dekedaa berbera iyo
Boorame dushiisiyo
Daafaha kismaayoo
Aan la isu diidayn
Dadkuna uu is jecel yahay
Dacartii qabiilkiyo
Danaystuhu ku kala xidhay
Oo laga dawooboo
Dadku yahay walaaliyo
Deris oodda wada yaal
Furi maayo duubkoo
Faraskayga kama dego
..............................
Jeer aan daliishado
Darwiishkii taleex iyo
Daafaha nugaaleed
Qalcadaha difaaciyo
Ka sameeyey daaraha
Ee yidhi dadkaygow
Dabkan aan shidaayaa
Dawadiina weeyee
Daafaca dalkiinoo
Dakharka iyo dubaaqada
Dacar how malaynina
Goobihii dagaalkee
Lagu dilay gumaysiga
Ee haadka duuliyo
Ka dibiray waraabuhu
Daribtii cadaawaha
Taariikhda dunidani
Dadka nagaga soocdee
Diiwaanka noo galay
Waa ka u da'weynoo
Darwiish lagu xusuustaa
Dariiqii xornimadiyo
Dawladnimada keenaye
Ina diirshay weeyee
Ilaa dogobyaduu shiday
Iyo duubcaddiisi
Daljirkii dahsoonaa
Dadaalkay sameeyeen
Taariikhda lagu daro
Furi maayo duubkoo
Faraskayga kama dego
..............................
Inta weli damiirkii
Uu ku sii danbeeyow
Digtoor iyo wadaadow
Danaystaha qabiilkiyo
Ku shaqaysta doqonkow
Doodi waa dariiqeed
Dadna waa is raacii
Dawladi midnimadeed
Diini waa ku dhaqankeed
Dulmi waa ka cararkii
Xaqna waa difaacii
Dagaal waa balaayiyo
Kii dumiyey qarankii
Waa daruuro da'ayoo
Soo saara dooggoo
Iina deeqa nabadiye
Ma doonnaa wanaagoo
Balaayada ma diidnaa
Ma dhisnaa dalkeenoo
Dadka ma u horseednaa
Dawo lagu bogsoodoo
Daacuunku kaga boxo
..............................
Inta weli damiirkii
Uu ku sii danbeeyow
Digtoor iyo wadaadow
Inta daacada ahay
Inta qaranki dimay iyo
Ka diiraysa xumahaay
Inta dibada joogtee
Dawlado shisheeyoo
Ku dhufteen dabayluhu
Ugu deeqa lacageey
Ilaah daayim weeyoo
Ma dulmiyo dadkiisee
Inagaa dulownoo
Daayeero noqonaye
Inta aan ilaahay
Dabaylaha dhacaayiyo
Badda inagu sii deyn
Dukumdaakum naga dhigin
Danbigaan samaynaa
Buuraha dushoodiyo
Buux dhaafshay dunidee
Xaqa duudsigiisiyo
Dulmiga ma iska daynaa
Mise wayska daalaye
Doqoni waa halkeedii
ALLOW DAWLAD
NOO KEEN (Maanso)
Maansadan Alloow Dowlad noo keen waxaa ay ka mid tahay Suugaantii ugu
dambaysey ee ay abwaanada Soomaaliyeed tiriyeen waxana curiyey Abwaan Maxamuud
Cumar Cigaal (Takar) oo Bare ka ah Dugsiga Sare ee Buuhoodle.
Waxaan ahay aqoonyahan
Axkaamta iyo shareecada
Madhabaha Islaamkee
Aa,imadu jideeyeen
Afartaba u shiikhoo
Awyare hordhiganayn
As,ilana mid Maaddi ah
Af shisheeye kay tahay
Aada uga jawaaboo
Eray lagu xidhaynine
Waxse iga awood badan
Ummaddaan la noolahay
Een iba ogsoonayn
Ayaa iga ordaysoo
Ummi iyo agnaan iyo
Afmiishaar dilaaliyo
Odayaal abqaystiyo
Dagaal ooge laayoo
Lagu soo asmeeyiyo
Inkaar qabaa u taliyoo
Bulshadii asqawdoo
Ambatoo habowdoo
Irmaankiyo horweynkiyo
Awrka dhibishaxleeyiyo
Aalo iyo Lo, xaasiyo
Ido laysku sii Daa
Sida Ilko dameeraad
Ayaa loo Sinaadoo
Geesigii adkaa iyo
Aarkiyo libaaxii
Laga alabasayn jiray
Ma ogtahay ardaal iyo
Afku xoogle tookhiyo
Ilmahaa u dhaartoo
Isaguna i daa iyo
Abhis buu ku waashoo
Ergo wuu ka quustoo
is aqoonsan weydoo
Ruux ruux Amraayiyo
Office order bixiyiyo
Askar laga cabsoodiyo
Aadmi kala xishoodiyo
Ixtiraam la waayoo
Aakhiru samaankaa
ibtilooyin wada oo
Isku ada asqawdaye
Aaway kala dambayntii?
Balse waa Adduunyoo
Ahaan mayso sidatane
Aarmiga markaan Guro
Een ammaanka soo sugo
Ninba waa ishiisoo
La is eegan maayee
Ha iska kala Aroortee
Imtixaan is reebreeb
Markuu uunku kala hadho
Ninka adhi dammaan iyo
Aaran geel la raacshee
Aydaa wareegiyo
Agaasime xil qaadoo
aqoontiisu siisiyo
Aagga Taliye Qaybeed
Ninba kuu istahilo
Hala kala Ogaadee
ALLOOW DOWLAD NOO KEEN>
waxaan ahay Waxgarad Oday
Amuuraha islaaxiyo
Amni kaga shaqeeyoo
Ergo xaajo lay wacay
Eexo ugu garsooreyn
Waxse iga awood badan
Ummaaddaan la noolahay
ee ibleysku duufsaday
Ayaa iga irdhoowdoo
Bal ayaan darrida taal
Waxay amar ka qaataan
Mid Ilaah habaariyo
Axmaq aan u tudhinoo
Aake iyo baroon iyo
Afdabayl ku weerara
Balse waa adduunyoo
Ahaan mayso sidatane
Aarmiga markaan Guro
Een ammaanka soo sugo
Abriskiyo abeeskii
Alleylkii wax miri jiray
Bahalkii amlayn jiray
Iyo agagaskii tuug
waxuu alamsanaayiyo
Axankii ha waayoo
Agoontii la dhici jiray
Urugadu ha daysoo
Islaaxiyo heshiiskiyo
Ha adkaato nabaduye
ALLOOW DOWLAD NOO KEEN
Waxaan ahay abwaan Weyn
Odayaad taqiineen
Abtirsiga ku raacoo
Murti iyo Odhaah gabay
erayada qormaayiyo
Hal abuurka maansada
Eebbaa igu Manaystoo
Isir baan u leeyahay
Waxse iga Awood badan
Ummadaan la noolahay
ee ibleysku duufsaday
Ayaa iga irdhowdoo
ma ogtahay afkeennii
Alifbeeto shaqliyo
naxihii aloosnaa
waxii uu ustaad baray
ardadiyo iskuulada
waa la kala Illooboo
Imtixaan la qaadaba
Uluuf baan gudbaynoo
Ibtilada waxaa dhigay
Ashqaraarka Video
Alxan muusik loo tumo
Iyo alalag beenbeen
Yaa amaan la moodoo
Ilbaxnimada qaarkeed
ambashay horseedoo
Dhaqankiyo asluubtiyo
anshaxii xumaayaye
Alloow sahal umuuraha.
Islaan iyo malaaq iyo
Ugaas iyo Suldaan iyo
Amiir iyo Garaad iyo
Usha Boqorka qaatiyo
Isimadi badnaadoo
Arbush bayna haystee
Alloow sahal Umuuraha.
Wax waliba inshaariyo
Inkaar iyo nacayb lehe
All ka cabsi mooyiye
Awgii siyaariyo
Awlalkiyo leggii waa
Kaalintii abwaankana
Dar iimaanka Beeliyo
Afku maal qadhaabtoo
Soor ku iibsadaa Dilay
Waxse la arki doonaa
Maanta la isku aadshee
Suugaanyahan Ardaa iyo
Gole loo umaamado
Afar jaban mid tuuroo
Iska amamaleeyiyo
Mid aqoonsi weyn iyo
Ashahaado haystoo
Intuu ararta guud maro
Ujeedada u Daadega
Ha lakala ogaadoo
Asad hayska Muuqdee
Alloow Dawlad Noo keen
Aamiin aamiin Aamii
Afartaa is dhaafsaye
Abwaanada dalkeeniyo
Aqoonyahanka dhoof jira
Idilkood ha gaadhoo
Idaajaa ha weriyee
Ina aadan weriyoow
Interneetka ii Geli........
Waxaa tiriyey
Maxamuud Cumar Cigaal (takar) |
